Prédikun séra Denis, Sunnudag 30. maí 2004
Andinn er líf vortÍ dag er hátíð Heilags Anda. Heilagur Andi er þriðja persóna guðdómsins, sannur Guð, ásamt Föður og Syni.
Þegar lærisveinarnir voru sviptir sýnilegri nærveru hans skildi Jesú þá ekki eftir munaðarlausa. Hann lofaði að vera með þeim allt til enda veraldar svo hann sendi þeim Anda sinn. Heilagur Andi kom yfir Maríu og postulana á hvítasunnu í líki logandi eldstungna.
Að vísu hefur Heilagur Andi að frásögn Gamla testamentisins veitt mönnum ýmsar náðargjafir, en á hvítasunnunni kom hann til kirkjunnar með alla náð sína, til þess að vera með henni eilíflega.
Við þetta varð samfélagið við Jesúm á vissan hátt enn nánara: Með því að veita því Anda sinn, hefur Jesús kallað fólki sína saman úr öllum þjóðum og gert það á leyndardómsfullan hátt að líkama sínum.
Þar sem Heilagur Andi er smurning Krists, er það Jesús sem lætur Andann streyma meðal okkar til að gefa okkur líf. "Andinn er líf vort" og því meir sem við afneitum sjálfum okkur því meir fáum "vér lifað í Andanum".
Ritningin segir okkur að Guð er kærleikur; og kærleikurinn er fyrsta gjöf Guðs til okkar og geymir hún allar aðrar gjafir. "Kærleika Guðs er úthellt í hjörtum vorum fyrir Heilagan Anda, sem oss er gefinn." (Rm 5:5)
Í skírninni tekur Heilagur Andi sér bústað í hjörtum trúaðra, til þess að helga þá og réttlæta. Þar sem við erum dáin eða að minnsta kosti særð fyrir tilverknað syndarinnar er fyrirgefning synda okkar fyrstu áhrifin af gjöf kærleikans. Heilagur Andi færir hinum skírðu aftur þá guðdómlegu líkingu sem glataðist með syndinni.
Í fermingunni er sá, er skírður hefur verið, styrktur af Heilögum Anda "Ferming" þýðir: styrking.
Heilagur Andi hjálpar okkur að elska eins og "Guð hefur...elskað oss" vegna þess að við höfum meðtekið "kraft" frá honum. Með þessum krafti Andans geta börn Guðs borið mikinn ávöxt t.d. kærleiki, gleði, friður, langlyndi, gæska, góðvild, trúmennska, hógværð og bindindi.
Heilagur Kýril frá Alexandríu hefur skrifað: "Við, sem höfum meðtekið einn og hinn sama Anda, það er að segja, Heilagan Anda, höfum á vissan hátt öll runnið saman hvert við annað og við Guð. Því þótt Kristur, ásamt með Föðurnum og Anda sínum, komi til dvalar í hverju okkar, jafnvel þótt mörg séum, er Andinn engu að síður einn og óskiptur. Hann bindur saman andana sem hvert okkar geymir... og fær þá alla til að birtast sem einn í honum. Því að með sama hætti og kraftur heilags holds Krists bindur saman í einn líkama þá sem það dvelur í, tel ég að hinn eini og óskipti Andi Guðs, sem dvelur í öllum, leiði alla til andlegrar einingar."
Kom þú, Heilagur Andi, og fyll hjörtu þinna trúuðu,
og tendra í þeim eld kærleika þíns.
Send þú Anda þinn, og allir verða endurskapaðir,
og þú endurnýjar ásjónu jarðar.
Vér skulum biðja. Guð, þú hefur uppfrætt hjörtu hinna trúuðu
með ljósi Heilags Anda.
Veit oss að njóta sannleikans í þeim sama Anda
og gleðjast ávallt sakir huggunar hans. Fyrir Krist, drottin vorn. Amen.