Prédikun séra Denis, Sunnudag 5. október 2003
Dag einn kom eiginmaður heim úr vinnu að öllu í óreiðu. Börnin voru enn í náttfötunum, úti að leika sér í drullunni. Tóm matarílát og umbúðir voru út um allt.Þegar hann kom inn í húsið kom hann að jafnvel enn meiri óreiðu. Óhreinir diskar, hundamatur á gólfinu, brotið glas undir borðinu og sandur við bakdyrnar. Leikföng og föt út um allt og lampi sem hafði oltið á gólfið. Maðurinn klofaði yfir leikföngin og flýtti sér upp tröppurnar, í leit að eiginkonunni. Hann var áhyggjufullur þar sem hann hélt að hún væri veik. Hann fann hana í svefnherberginu - í rúminu að lesa bók. Hún brosti og spurði hann hvernig dagurinn hefði verið. Hann horfði ringlaður á hana og spurði, "Hvað gerðist hér í dag?" Hún svaraði brosandi, "Á hverjum degi þegar þú kemur heim úr vinnunni, spyrð þú mig hvað ég hafi gert í dag?" "Já," svaraði hann. "Ja, í dag gerði ég ekkert."
Í upphafi, þegar Guð skapaði heiminn, skapaði hann sömuleiðis hjónabandið og gerði það að hyrningarsteini mannlegs samfélags (svo og kirkjunnar). Bæði yfirgefa maðurinn og konan fjölskyldur sínar og sameinast í myndun nýrrar fjölskyldu. Það gerði Guð til að varðveita mannkynið þar sem af einingu karls og konu kviknar nýtt líf og börn fæðast.
Það sem skiptir máli er að það var Guð sjálfur sem stofnsetti hjónabandið, ekki við. Þegar Guð stofnaði hjónabandið setti hann því ákveðin markmið og gaf því ákveðin einkenni.
Hjónabandið hefur tvö megin markmið:
1. Getnað barna og menntun þeirra.
Getnaður og menntun barna er megin ástæða þess að Guð stofnaði hjónabandið. Þessi tilgangur hjónabandsins er bæði skylda og réttindi hjónanna. Hjónin verða að vera reiðubúin að taka við þeim börnum sem Guð ákveður að gefa þeim.2. Hjónin deili lífi sínu hvort með öðru - sýni gagnkvæma umhyggju og kærleika.
Hjónin deila lífi sínu hvort með öðru. Þau sýna gagnkvæma umhyggju og kærleika. Lokatakmark hvers manns er að komast til Guðs. Eitt göfugasta viðfangsefni hjónanna er að styðja hvort annað og börnin til þess að ná því takmarki.Hjónabandið einkennist af tvennu:
1. Einingu
Eining þýðir að fjölkvæni leyfist ekki. Einungis einn maður og ein kona geta gengið í eina sæng. Þessi regla útilokar nokkurn þann möguleika fyrir mann að eiga tvær eða fleiri eiginkonur. Það þýðir einnig að kona getur ekki átt tvo eða fleiri eiginmenn. Það útilokar að hjón skiptist á mökum og sömuleiðis eru hjónabönd samkynhneigðra útilokuð. Hjúskaparbrot eru einnig bönnuð.2. Órjúfanleika
Órjúfanleiki. Í Guðspjalli dagsins segir Jesús okkur, að þegar maður og kona giftast og verða hjón, þá eigi þau að vera hjón það sem eftir er ævinnar og ekki skilja. Jesús lætur það koma skýrt fram, að giftingin er stofnuð af Guði sjálfum, hún er sameining, sem á að vara allt lífið - þannig vill Guð að hjónabandið sé.Þetta kom postulum hans í opna skjöldu því Móse hafði leyft skilnað.
Hvergi tekur maðurinn á móti öðrum manni á jafn víðtækan hátt og í hjónabandinu og það verður kristnum manni að eftirmynd kærleika Guðs: Í anda þess kærleika, sem hjúskaparaðilarnir taka hvoru öðru, á maðurinn að sjá hvernig kærleikur Guðs veitir honum viðtöku sjálfs hans vegna og hvernig honum er borgið í þeim kærleika. Og við eigum að elska hvert annað eins og Kristur elskaði okkur. Guð er okkar megin og fyrirgefur okkur án afláts. Einmitt þess vegna hvílir sú skylda á kristnum manni í hjónabandi að hann fyrirgefi maka sínum án afláts og haldi tryggð við hann.
Október er sérstaklega tileinkaður Rósakransbæninni, svo að ég hvet alla til þess að reyna að biðja að minnsta kosti hluta af Rósakransbæninni heima á hverjum degi.