Prédikun séra Denis, Sunnudag 27. júlí 2003
Hvað get ég fært Jesú?Lítum sem snöggvast aftur á guðspjallstexta dagsins og athugum hvort við sjáum eitthvað óvenjulegt við hann.
Þið hafið ef til vill tekið eftir því að guðspjallið er tekið úr Jóhannesarguðspjalli, sem er óvenjulegt vegna þess að árið í ár er raunverulega ár Markúsar. Nokkra næstu sunnudaga er guðspjallið sótt til Jóhannesar, einfaldlega vagna þess að guðspjall Markúsar er of stutt til þess að ná yfir alla sunnudaga ársins. Þess vegna verður Jóhannes að koma og hjálpa til!
Sagan, sem guðspjall dagsins greinir frá, fjallar um mettun þúsundanna í óbyggðinni. Í henni höfum við dæmi um samúð Jesú með fólkinu. Jesús sjálfur spyr postulana hvar þeir geti keypt mat fyrir mannfjöldann. Jesús er svo sannarlega okkar Góði Hirðir.
Tvær ástæður liggja til þess að þessi kraftaverkasaga er sérstök.
- Annars vegar er þetta eina kraftaverkasagan sem er að finna í öllum guðspjöllunum fjórum.
- Hins vegar er þetta eina kraftaverkasagan sem sögð er á tvo mismunandi vegu. (þar sem fimm þúsundir eru mettaðar eða fjögur þúsund).
Reyndar er sex mismunandi útgáfur af þessari sögu að finna í guðspjöllunum, þannig að þessi atburður hlýtur að hafa verið mjög mikilvægur í frumkirkjunni. Við skulum reyna að átta okkur á hvaða boðskap þessi saga flytur okkur í dag.
Okkur er sagt að Jesús hafi tekið það litla, sem fylgjendur hans höfðu - fimm byggbrauð og tvo fiska - og gert þakkir. Síðan fékk hann postulunum matinn, en þeir gáfu fólkinu að eta. Þegar allir höfðu borðað, voru hvorki meira né minna en tólf fullar körfur afgangs, ein fyrir hvern postula!
Þannig sjáum við að Jesús getur á undursamlegan hátt margfaldað mat, en það sem meira máli skiptir er að hann getur á sama hátt margfaldað það litla sem fylgjendur hans hafa fram að færa. Þarna í sögunni voru það fimm byggbrauð og tveir fiskar. En hvað höfum við að bjóða Jesú í dag? Við getum, meðal annarra hluta, boðið honum gjafir og hæfileika þá, sem Guð hefur gefið okkur.
Við ættum að nota hæfileika okkar. Hér á ég ekki við einhverja óvenjulega hæfileika, heldur algenga, hversdagslega hæfileika sem oftast ber lítið á. Slíka hæfileika getur Jesús notað til þess að gera kraftaverk. Tökum dæmi. Þegar við notum hæfileika okkar í þjónustu Guðs, gerum við kristindóminn trúverðugan í augum þeirra sem ekki trúa. Hæfileikar sem færðir eru Jesú til þess að auka dýrð Guðs, ná langt í útbreiðslu fagnaðarerindisins. Allir hafa eitthvað fram að færa.
Oft erum við fljót að biðja Guð um að uppfylla einhverja ósk og það er gott og blessað - Guð vill að við gerum það. Hins vegar erum við oft ekki eins fljót að leita leiða í þjónustu okkar við Guð og að gefa honum hæfileika okkar, tíma, okkur sjálf og jafnvel þjáningar okkar.
Við getum, til dæmis, stækkað ríki Guðs með því að leggja fram hæfileika okkar hér í sókninni:
- Tónlistar- og myndlistarhæfileika má nota til þess að gleðja aðra.
- Hæfileikar á sviði kennslu nýtast í boðun fagnaðarerindisins.
- Glaðlegur maður getur glatt og uppörvað aðra.
- Góður ræðumaður eða sá sem á gott með að koma fyrir sig orði, getur breitt út háleitar hugsjónir eða háleit markmið.
- Hæfileikinn til þess að aka bíl gæti nýst til þess að flytja einhvern til messu á sunnudegi, einhvern, sem að öðrum kosti kæmist ekki til kirkju.
Við skulum nú í smástund biðja í hljóði - við skulum færa Jesú hæfileika okkar og biðja hann um að nota þá eins og hann vill.