Prédikun séra Denis, Sunnudag 18. janúar 2004
Það var í Kana, lítið þorp skammt frá Nasaret, að Jesús gerði sitt fyrsta opinbera kraftaverk. Þessi saga sýnir okkur umhyggju Maríu í garð hinna nýgiftu og hvernig Jesús gat hjálpað þeim.Jesús og María voru viðstödd brúðkaupið og tóku þátt í fögnuðinum. Þau deildu með ungu hjónunum í hamingju þeirra og fögnuði og hjálpuðu þeim að leysa fyrstu erfiðleika hjónabands þeirra. Þetta ætti að vera okkur öllum mikil hvatning. María er andleg móðir okkar og hún aðstoðar okkur að fá hjálp frá Jesú.
Þegar við förum til hans með tómar hendur en opið hjarta þá getur hann breytt hlutunum til hins betra. Þetta er ástæða þess að það er svo afar mikilvægt að fjölskyldan biðji saman sem ein heild. Þetta er leiðin til að snúa sér til Jesú og biðja hann um hjálp.
Til er saga um mann, sem hafði verið mikill drykkjumaður, en í lok gerðist trúmaður og reglumaður um leið. Nokkrum mánuðum síðar mætti hann gömlum drykkjufélaga sínum. "Nú ert þú víst orðinn svo trúaður, að þú trúir á kraftaverk", sagði hann háðslega. "Já, ég trúi á kraftaverk", svaraði hinn. "Þú getur þá líklega skýrt það út fyrir mér, hvernig Jesús breytti vatni í vín, í Kana." Hinn svaraði: "Jesús er Guð og Guð getur gert svona. En gerðu svo vel að ganga heim með mér. Þá skal ég sýna þér annað kraftaverk, sem hann hefur gert. Jesús hefur breytt áfengi í húsgögn, góð föt og hamingjusama fjölskyldu."
Það er sagt að sú fjölskylda standi saman sem biðji saman. Bænin er ein af þeim leiðum þar sem við leyfum Jesú að hafa áhrif á fjölskyldu okkar.
Við minnumst einnig núna að "Alþjóðleg bænavika kristinna manna fyrir samstöðu kristninnar" hefst í dag. Við eigum að biðja fyrir einingu meðal allra kristinna manna, eins og Jesús gerði þegar hann sagði: "Ég bið SSS að allir séu þeir eitt, eins og þú, faðir, ert í mér og ég í þér, svo séu þeir einnig í okkur, til þess að heimurinn trúi, að þú hefur sent mig. (Jn 17.20-21)
Hefð er fyrir því hérlendis að Samstarfsnefnd kristinna trúfélaga á Íslandi (sem Kaþólska kirkjan á Íslandi tilheyrir) annist um framkvæmd vikunnar á höfuðborgarsvæðinu. Virku dagana verður gengið á milli söfnuða og bænastundir haldnar, t.d. í Kristskirkju í Landakoti verður haldin bænastund á miðvikudaginn nk., kl. 20:00.