Prédikun séra Denis, Sunnudag 25. júlí 2004
75 ára vígsluafmæli Kristskirkju23. júlí sl. voru liðin 75 ár síðan van Rossum kardínáli vígði dómkirkju okkar í Landakoti. Með gleði minnumst við þess í dag.
Dómkirkja okkar stendur undir vernd Krists, konungs alheimsins. Hún er því "konungskirkja". Þegar hún var komin upp var hún stærsta kirkja Íslands og stærsta dómkirkjan á Norðurlöndum.
Einnig minnumst við þess í dag að 75 ár eru liðin síðan van Rossum kardínáli veitti sr. Marteini Meulenberg biskupsvígslu, þann 25. júlí 1929. Þessara mikilvægu atburða staðfestu, á þeim tíma, kirkjulegt sjálfstæði kaþólska trúarsamfélagsins á Íslandi.
Marteinn Meulenberg var fæddur árið 1872. Faðir hans var þýskur en móðirin hollensk. Hann var tvö ár sóknarprestur í Danmörku og kom hingað til lands árið 1903. Þegar Ísland varð sjálfstætt ríki, árið 1918, sótti Meulenberg fyrstur útlendra manna um ríkisborgararétt á Íslandi.
Meulenberg var mikill atorkumaður og átti sér stóra drauma um viðreisn kaþólsku kirkjunnar í landinu. Hann gaf út á íslensku kaþólsk fræði. Hann fékk séra Matthías Jochumsson til þess að þýða á íslensku kaþólska sálmabók. Hann gaf einnig út kaþólska bæna- og messubók.
Árið 1921 keypti Meulenberg Jófríðarstaði í Hafnarfirði og fimm árum síðar var þar risinn nýr spítali Jósefssystra.
Árið 1926 kom út í fyrsta sinn Merki krossins sem er tímarit kaþólsku kirkjunnar á Íslandi. Séra Meulenberg skrifaði inngangsgrein en aðrir sem í ritið skrifuðu voru Stefán frá Hvítadal og Halldór Kiljan Laxness. Meulenberg dó árið 1941.
Guðspjall dagsins segir okkur að Jesús er hið sanna musteri Guðs: "Brjótið þetta musteri, og ég skal reisa það á þrem dögum." Jesús er "staðurinn þar sem dýrð Guðs býr"; og fyrir náð Guðs verðum við einnig musteri Heilags Anda, lifandi steinar sem kirkjan er byggð úr.
Í síðari ritningarlestur dagsins, skrifar Páll postuli: "Vitið þér eigi, að þér eruð musteri Guðs og að andi Guðs býr í yður? Ef nokkur eyðir musteri Guðs, mun Guð eyða honum, því að musteri Guðs er heilagt, og þér eruð það musteri." (1Kor 3.16-17)
En sjálfsagt, í jarðneskri tilveru sinni þarf kirkjan á stöðum að halda þar sem samfélagið getur komið saman. Okkar sýnilegu kirkjur, heilögu staðir, eru myndir hinnar helgu borgar, hinnar himnesku Jerúsalem þangað sem við erum á vegferð okkar sem pílagrímar.
Það er í þessum kirkjum að kirkjan hefur um hönd almenna tilbeiðslu til dýrðar hinni heilögu þrenningu, heyrir orð Guðs og syngur honum lof, lætur bænir sína stíga upp og ber fram fórn Krists sem er nærverandi á sakramentislegan hátt í miðju samkundunnar. Kirkjurnar eru einnig staðir til að skoða hug sinn og biðja persónulegar bænir.
Á 75 ára afmæli Kristskirkju skulum við biðjum sérstaklega fyrir sóknarbörnum dómkirkjunnar.